العين من حمل السهر متكيده

ولا انت ما شفتك تشكي ياعنيد

اسرفت بي مافيه شور تأيده

بطنك من الجمر وظهرك من الجليد

ياخوفتي دام الشفوف محيده

يوم من الايام تصبح من حديد

كم كنت جامح والبروق مسيده

وتسوق ركبك للنزول وللشديد

واصبحت عود في ظهر زويده

تحويشته صفر .. وطموحاته نشيد

ابطيت ما اخطيت وخطاك اتصيده

على كثر ما مر من عاتق فريد

حتى رسايل عالم متقيده

من خلف سور قصور هارون الرشيد

العام في عنق العنود قليده

واليوم يارخص الذهب في كل جيد

لو كنت عبد يستحي من سيده

ما شفتك اصلا ياموحدني وحيد

ذيك النفوس اللي تقول معيده

تفداك لو هي من جديد في جديد

اللي بلا دين واسلوم تقيده

لبسه كفن لا تحسب انه ثوب عيد

سلم على اللي لو زمانه بيده

بأقصى ضلوعه شي لا يمكن يبيد

لو راودته الباشا المتسيده

تلقاه ما يستنكر العيش الزهيد

والفت نظر بنت الرجال الجيده

من واحد لا يستزيد ولا يزيد

يوم الفوائد مستفاد وحيده

وان غاب مهما غاب ما كنه فقيد

وشلون تفرق سيده من سيده

إلا بعد فرق الشقي من السعيد

الطيبات قريبه وبعيده

وان شانت الايام ما رحنا بعيد

بيوتنا تحت الشموس مشيده

وارزاقنا بيدينا خلاق العبيد

والشعر فيه معلقه وقصيده

بين المصيبه كان ما سر القصيد

يرجع مثل بنت الرجال الجيده

لا ساقها الحظ الردي يم البليد