ياللي بمرباعي الموعود مهتمه

انتي مطر صيف لا رحتي ولا جيتي

رحلت لا امدح زمان اول ولا اذمه

إلا اني اضحك على سابق تناهيتي

يا مقبله ليه خليتيني اليمه

يا حلوها لو بدل ما اقبلتي اقفيتي

يا ما تمنيتي العشق يحكي فمه

حتى حكى العشق فوق اللي تمنيتي

عمر نثرتيه .. رحت انساك والمّه

والى تذكرتك اذكر عمر تشتيتي

انتي و وقتي وحظي ما لكم ذمه

ياما على ونتي غنوا و غنيتي

واجرحي اللي نفذ صبري وانا اضمه

كيف اتناسى صوابي لو تناسيتي

ما انتي بذيك اللي الشوق اهدرت دمه

وانا اللي اظن بين ضلوعها بيتي

ياليتني قبل اكذّب راعي النمه

سويت في طفلنا اللي فيه سويتي

انا الوفا بين اخوه وبين ابن عمه

وانتي الجفا وبين ما رحتي وحليتي

يمكن نخيتي الزمان وشح باللمه

او شفتي الصدق زودها ومليتي

كذاب لو قلت قلبي راح ما همه

والفين كذاب لو ما قلت حبيتي

ياللي تركتي الهوى غرقان في دمّه

جيتي غريبه ورحتي مثل ما جيتي