غريب ياللي جيت من غيرميعاد

مثل المطر له بالمضامي عوايد

كلك بروق وقلب شاعرك رعاد

وأمطرتني وأمطرت فيك القصايد

مدري هو انت مضيع الدرب نشاد

والا أن قلبي صيدتك وانت صايد

مدري تعوضني عن السهد برقاد

والا تشب بموق عيني وقايد

مريت وعيونك قويات وحداد

الا ومع هذا تدل المصايد

كنك تمثل غطرسة سيد اسياد

والا غرور النصر بعيون قايد

يوم التويت بخافق الحب وانقاد

اقفيت فيه ورحت صايد وفايد

لو ما ذبحت العرق والرمح ما صاد

ما شفت باوراق القصيد الفرايد

اخذتني كلي من النون للضاد

الله يجيرك ما بقى لي شرايد

علمت عيني قصة الشرب والزاد

وحكاية القمري بخضر الجرايد

لو مر عقبك طاغي الزين وش عاد

مشاعري شعب ولك الحكم سايد

اخذت من ترنيمة الوصف ما جاد

تفوز فيها في نهار المزايد

صمتك يشب الجمر بشفاك وقاد

وضحكك يذكرني بيوم المعايد

يوم القمر له بالوطا نور وابعاد

على جبينك له فراش وسايد

للحسن بعيونك بطولات وبلاد

كلك على بعضك على الحسن زايد

شمسٍ لها من مشرق الدار ميلاد

الحسن كاسيها عقود وقلايد