الشمس تفضح ستر سود الليالي

والعين شافت كل شي بمحله

يا مرخص قدر الغلا وانت غالي

جنب وخل العلم دقه وجله

ما عاد فيها للمشاريه تالي

عجزت اروضها على كل مله

وعرضتها الصدر الوسيع الشمالي

حتى يمللها فضاه وتمله

لو جيتني ما مر صوتك ف بالي

لله ما عاد انت اقرب الناس لله

قلبي من اسرارك وذكراك خالي

كل العلوم الماضيه مضمحله

ما تشفي اوجاع الجفا (كيف حالي)

لو نها عقب البطا مسفهله

(افا) يا لاقصى عقب مانت الموالي

ما عاد لك بين المواليف طله

ابعد وانا شفني عن القرب سالي

يا الاجودي لا تزود الطين بله

كلٍ يقول انا القريب المثالي

قرب مثل قرب(البنادم) وظله

وش فايدة قربه وكنه ضلالي

دايم معي لكن عجزت استضله