جيت كلي ولا خليت مني  شي

ورحت واللي معي مبداي واخلاقي

يادروبٍ توديني ماهي بيْدَيّ

ليت  قلبي ولو مره ثنى ساقي

لو قسى الوقت  يارجّال ماهي هيّ

يبطي اليأس مايستوطن اعماقي

يوم مديت لي من عزم روحي فيّ

ماتضيع الهقاوي من يد الهاقي

لو تساوم جروحك عزم روحك عي

في مجامل جروحي ويش انا لاقي

غن ياهاجسي  والحرف ماهو  غي

ما يجف القلم في موسم اوراقي

وانت يانبضي اللي في خفوقي حي

لك يحن رْعَدِيْ  ويلوح براقي

كل مالك تزود وهم ماغير شويّ

جعلهم يبعدون ولالهم باقي

يبدي الصدق  في وجه الليالي ضي

وينفضح ليلهم في لحظة إشراقي

كم تجاوزت عذر وجرح قلبي نيْ

لين قلبي لقى لي عذر لفراقي

يشرب العرق لين اروى ضماه الميّ

وتجدب الارض والشرهه على الساقي  

انطوت صفحة الماضي باهَلْهَا  طي  

يكفي أني صبرت وعشت بأخلاقي