انشرح بال القصيد وقلت اشيل لحونه

كود يدري صاحبي عن سر ضيقة بالي

وامطرت فوق الورق عذريةٍ مجنونه

شفت عقلي واصلٍ فيها حدود هبالي

واعساي ارضي غروري وارضي المزيونه

لين اشوف ان الزعل ولى ولا له تالي

ياحبيبي كل طيرٍ ماله الاغصونه

وانت قلبي لك غصونٍ مورقه وضلالي

الفراق صعيب لكن الوصل ياهونه

بس يكفيني ليا من قلت كيف حوالي

ان تعمدت الجفا هذا الهواء وشطونه

وان تخيرت الفراق اقول ياعزالي

يوم احبك ما تخيلت الهواء وشلونه

شفتك الحب الزلال وقلت دوك حبالي

ان رويتك ما سألت الماء متي يردونه

لو توديني دروبك للطريق الخالي

ما شكيتك والجفا تهدي على طعونه

مادروا عني محبيني ولا عذالي

يوم مجناك البحرواصدافه المكنونه

كيف تنسى يوم انا جيتك وموجه عالي

داوني بالوصل وارحم روحي المرهونه

وان تخليت انت عن دنياي وش يبقى لي

من سمع كلمة هلا من مبسمك وشجونه

وش يسوي لاسمع ( يامرحبا يالغالي)