اطعن بحد العيون السود من قدك

ان كان لك دين خل العين تستافي

ماهو غريبٍ عليك ولا على ودك

كثرت في الطعون ورحت متعافي

تاخذك الايام وتوديك وتردك

يخونك الوقت وتعود علي الوافي

ياطول ركضي وراك وياكثر صدك

ماكنك اللي سلبت العقل ياكافي

محلك القلب كان ان الغلا شدك

من غفلة الشوق صح النوم ياغافي

اخر علومك يقولون الجفا حدك

وشلون دليت درب الوصل ياجافي

هذي هي اوراق شعري تحتري ندك

من غيبتك والدفاتر بيض وعجافي

كانك علي الشوفه اللي شفت من جدك

يا كبر فرحتك لو تدري عن الخافي

تاكد ان المشاعر ما تقف ضدك

لا خانها البرد ترجي صوتك الدافي

لو راح بي جزر غيرك جابني مدك

لا هب طاريك بشراعي ومجدافي

تشوقني لا لبست من الوفا قدك

مالي عذر عن وفاك وزينك الصافي

الليل قطعت سواد ولا كسا خدك

والشمس ما غيرت من ليلك الضافي