تباشروا بغيابها ياعواذيل

حبيبتي راحت ولا رحت معها

علمي بها تروي جفاف المناديل

بين الدروب اللي على الله سنعها

ما ودعتني في يمين الخلاخيل

راحت بكل علومهامن جزعها

وداعها في دمعةٍ كلها ميل

كفي حضنها يوم قلبي سمعها

واقفت تهزع في حسين التعازيل

لا واهني ضلالها اللي تبعها

بغيابها كن الاوادم تماثيل

عيني تشوف وشوفهاما نفعها

من يوم غابت شمسها ليلها ليل

الغيبه اللي خاطري ماوسعها

وليلٍٍ ما هي نوره قليل المحاصيل

جاب الهموم من الشتات وجمعها

لين انجرح صوت العنا بالمواويل

واسترسلت بنت الغياب بفزعها

وامطرتها بين المحاني هماليل

قصيدةٍ كلي ولع من ولعها

يوم انها لاخبار خلي مداهيل

فكري رقى روس الطوال وبدعها