يقولو إن الزين بس للصبايا

حكي الجياكر صدق مأخوذ خيره

عندي حبيبٍ فيه كل المزايا

فوق الشهامه أشهد إنه دميره

له نظره تسوي سواة وسوايا

ورزة عقال ماهي لحد غيره

وغمازتين هناك صوب الشفايا

ونظرات عينٍ يالخلايق خطيره

ودي أشوفه كل لحظة معايا

عيني بصيره بس يدي قصيره

صرت ألمحه في عين كل الزوايا

وأموت لا جاء ذكره بأي سيره

أترك عشانه كل عمري ورايا

و أبنيله بوسط الحشا ألف ديره

سبحان من خلى االحسن فيه آية

قلبي هواه و مدري وشو مصيره

من يوم شفته .. الوصل صار غاية

و رسمت في لحظة أماني كبيرة

و أظنني تناسيت كل البلايا

و عيوبه صارت في عيوني صغيرة

(كحيان) و (منتَف) قليل العطايا

مير أشعر بظله بأني أميرة !!

يرمي سهام العشق أحسن رماية

و (ينيشن) قليبي و ينثر عبيره

كذاب ٍ و يحلف ماله سوايا..

... و لا جا يناديني ينادي "سميرة"!

لكن أحبه , , يا بلاه و بلايا

و أبقى أتحمل سلبيات ٍ كثيرة

لأني وهبته الروح و أجمل هدايا

حب ٍ على إخلاص ٍ مع شوي غيرة

و صرت أعذره و أهيم به في عمايا

و أقول يرجعلي و يعقل مسيره

جنن قلوب الناس و أحلى الصبايا

و طيرلي قليبي , ملعون خيره !!!