بعض  الغلا  يشبه  صباحات  برلين

صاخب ،  ومفعم  بالحياة  ،   يتجدد

برلين ، وأنفاس  الندى  فجر  تشرين

والشمس  خجلى عن  شجرها تصدد

والمعطف   الشتوي  دفا  عنق  ويدين

وبرد  المشاعر  ..   ف العروق   يتمدد

تمشي الشوارع وين مدري على وين

والغيم   يحضن   غيم  ،  قبل   يتبدد

كل  الوجوه  اللي  تبسم  ..  عناوين

والدرب   الأجمل  ..  وجهةٍ  ما  تحدد

الناس  ،  والدنيا  ..  تمرك   جناحين

وتطير  عينك  في  السما  ..  ما  تردد

ترمي  على  أول  طاولة  غربة  سنين

يمكن  كذا  .. احساس الطريد  المهدد !

جرب  ، شعور  المغترب  في  البلادين

شاعر ، وفي المنفى .. من  العوز  ندد

والقهوة  المرة  ..  مثل   طيف   غالين

وأنت  الوحيد  ..  أشلون  تقدر  تعدد

وقتك   يمر ،  وف آخر  الشارع  أثنين

مدري ، من الثاني ، من اللي يتودد ؟

‏والطاولة    القصيا    عليها    كتابين

أديب  ، شاعر  ، طالب  .. ولا تشدد ؟!

أحيان   ما  يلقى   التساؤل   براهين

وأحيان  ..  من  نفسك  لنفسك  تسدد

لا تبتئس ، عش لحظتك ، صبح برلين

يحتاج   في  كل  يوم تصحى .. تجدد