يا حادي الدمع .. صب من الفناجيل

الليلة الجفن ، ما يشره على النوم

واللي على خاطري ما يشبه الليل

لكن تنامى : ظلام ، وصمت ، ونجوم

قلت أفرش العين في درب المناديل

يوم المطر .. ما لقى في صدري غيوم

في صدري .. دفوف ، وحتوف ، وهلاهيل

وما يعدل الواهس إلاّ ( رأس سلوم )

كن الحشى .. يوم أكنّه به طرد خيل

وإن عمّر الكيف ، كنّي ( قيصر الروم )

من كل ملح البحر .. لعذوبة النيل

تقطر يديني .. وقلبي ما نبت يوم

وحدي وقفت .. وهمى غيث الغرابيل

ما يهدم ثلوم .. لكن يبني ثلوم

ما فاح صدري ، ولكن ريحة الهيل

تعن في خاطرٍ .. ما يرخص السوم

تعبت أصب الظلام .. وينشف الليل

عن ليلٍ أكثر ظلام .. وصبحه هموم

وأعَرْفْ قل الوفا .. هم وغرابيل

جليد .. لو الجسد ، يلتف بهدوم

لأصحابنا .. ما ذخرنا لو بقى حيل

وأصحابنا قوم .. واللي من هنا قوم

وما هوب منا القسا والعدل والميل

اليا غدا ضدّنا ما يقدر يقوم

لكن خِلِقنا نجي غبن الرجاجيل

والله خلقنا .. نروح علومنا علوم