ضوضاء صدري واكتراث ضْلوعي

وِمْناحَر الفرقى وْخيل وْداعه

وْأزمَة المحتاج واوّل جوعي

وترياق هَمّ الليله الجَمّاعه

ودمعة (هلا) كنْها نقيض دْموعي

أسْقَت جذور وْروده بْمِرْباعه

في الساعه اللي نوّخَت مشروعي

الله يمْحَق حَظّ أمْحَق ساعه

من بَعْدها يومي خويّ اسبوعي

أستفتي الماضي وافِلّ شْراعه

واعود بادراجي واقِيْد شْموعي

يعني أبى اضْوي للخُطى شَمّاعه

واشْحَذْ هِمَمْ فَزْعات بَعْض رْبوعي

حِزْني وْياس المضْغَه الملتاعه

مَلّيت من كُوعي وْحتى كوعي

(يَضِيْقُ ذَرْعاً) بَعْد شَقّ الطّاعه

يستَنْفِر طْبوعي عسى انّ طْبوعي

تغدي هي الغَزّايَه الفَرّاعه

إدراك نفسي وانخراط جْموعي

خَلاّني أتْصَنَّعْ لقاه صْناعه

غريب تفكيري ونادر نوعي

كَنّي على صَدْر الزّمن سَمّاعه

نبضه ودقّاته وصحوَة روعي

وتقَزّمِك يا الخطْوه الطمّاعه

الأصل وَعْيي بالحَدَث وِفْروعي

تركيبة مْخيخي وطُول ذْراعه

وعْصارة الأيَّام هِيْ مجموعي

تدِقّ ناقوس الخَطَر واوضاعه

أبْصِرْ بعيني واحتمي بِدْروعي

واهوى مساس النار والولاّعه

لو منطقي أحيان كَنّه (شْيوعي)

أعِفّ عن سِلْمه واثير صْراعه

وليا اختَلَف وضعي على موضوعي

آأزّم الشرّايه البيّاعه

حجْب العطا من بحري لْينبوعي

فَزْعَة هل (العشوى) بَلا فزّاعه

يعني كذا يا النادر المسموعي

خَلّيتني بين الرّجال وْداعه

أصير لا معطي وَلا ممنوعي

إشاعةٍ في اشاعةٍ في اشاعه

وتْصير ضوضائي وْهَمّ ضْلوعي

ثِنْتين في صَدْر الزّمن سمّاعه