كيف البحر في غيضه

موجه تجى زرقه وموجه بيضه

كيف البحر فالنوه

يطلع دفاين كامنه من جوهّ

وارعى بداك فى ناقص اتدير مروه

معاه من نوا ستره ينال قريضه

بين الحباب ايورطك فى سوه

ويقازيك يبقالك كما العضيضه

ولك ينطحى فى لرض طحى الدوه

وكمين عقل عامر ماحتر فى هيضه

كيف البحر وشرابه

ساكن وهادى فى اوقات اطيابه

وزرقه وبيضه موجته قلابه

ويدردر أن هفنه قبالى قيضه

مره امواجه للرجا خيابه

ومرات بالفرح تبقى الهن تهييضه

ليام كيفن لا تغربك كذابه

الميخوذ ما تنهض ولا بنهيضه

شديد العزايم شالهن بغلابه

ملاحاه ما يفيد المريض جضيضه

ويظهّرن ليام كى تظهيره

ويكفن اصحاب العرف درس وعيضه

لايشطهم الزمان لا تدبيره

لايبدّلوا مبدا سنن وفريضه

كيف البحر وارياحه

ايجن بالفرح والكرب للملاحه

وان كان القضا مكتوب فوق ألواحه

لرواح للسبايب عندهن تعريضه

ليام بالكوارث يافتى زحزاحه

عواتى لهن بالواثقه تنفيضه

كمين صرح داعنه على مطراحه

واخلى مسرحه ليثه بعد ترويضه

خلاه الزمان اطلال للسواحه

عماره على وجه الوطاه ربيضه