أكون المثمر الشامخ وعودي بالفخر فواح
جنوني حضرته تاريخ .. يكتبني ويقراني
واذا اثمر غصن غيري يطيح ومثمري ما طاح
ويبقى غصني المثمر عطايا لكل خلاني
وحيد وبسمتي أمي وابوي وشجرة التفاح
امد النور واشعل في المدينه طيب اخواني
أنا من قبل ما أخلق عرفت ان الظهر مرتاح
وعرفت اصلي قبل اسمي واشجاري واغصاني
وجيت اقهر ظلام ٍ من زمن ما عانق المصباح!
وانا ما اقول غير ان الضوى ياخذ من لساني
ارف الجفن في زفة حضور الحزن والأفراح
ولا يشكي طرف مني عطيته كل جنحاني
كتبت ولا شربت إلا بحر فيه الشعر ملاح
رويت ولا بقى غير الضما بوجيه عدواني
غروري يفتح الدنيا تواضع / ينكسر مفتاح
على شاعر بلاط الغي / جوخ القول عداني
انا ماني من اللي لا كتب خلى الكفوف سلاح
ولاني .. من لبس ثوب القصيد وبدل الواني
ولا لي غير شدوك يالحبيبه يوم دمعك سااح
ولا لك غير صوتي يالمراجل وآخر احزاني
أغني دون ما اعاني ولا تعاني معي ارواح
أنا كل البقيه في حياة اللي .. تباكاني !!
وأنا من علّق القمرى على صدر الليال ورااح
ولا ادري من الممكن يجي في يوم والقاني