أحبّك عتق من كسر الخواطر من فراق الكل
وأحبّك فالمطر في ساحة الشارع، وجدرانه
وأحبّك مثل ريحانه سقتها أمي بحب وظِل
وقلبي تربتك، وأنتِ بغرس الحب / ريحانه
معي وجهك هُدى مادد يدينه لو دعائي ضّل
شعورٍ بالوفاء لا خرّ من قلبي صدى أحزانه
حبيبة كل مافيني، ولا فيني، قليل ومل.!
من النظرة على عيونك وهي بالحب هيمانه
جمعنا حلم في حيّ الصباح، وبلله بالطّل
وباقي مبسمي يذكر دفا مبسمك.. وألحانه
أنا من ظِل، يتفيأ على أوراقي كثير.. وفَل
ووحدك من نبت في فيّتي، وأتقاسم أغصانه
وأنا حولك ومن حولك شعوري ماذبل أو قل
مشيت العالم المقفر غريب، وحسك إيمانه
خطاوي صمت ما تخفت معاي ولا تدوّر حل
ولا صوتي بيارق لوّحت للبحر/ والدانه
ووحدك حِل في هذا النظر، والقلب هذا حِل
هنا مرباعك اللي ما يبس نبضه ولا أشجانه
يغيب الكل من بالي، ولا تغيبين مثل الكل
معك بالي، وساحة شارعه، وظِلال جدرانه