دقت الساعة بقت خامسة
وانتي لسه موصلتيش
معادي معاكي كان خامسة
وكل دقيقة يوم بيعيش
قعدت استنه في معادها
وقولت اشرب لي كاستين شاي
وأنا قاعد ومستني
وقطر يروح وقطر الجاي
وأنا عمري ومستني
ومش فاضي يقول مش جاي
وكاستين صبحوا في العشرين
وساعتي دقت العشرين
وبرده لسه مستني
واقول الصبر في تأني
يعدي القطر ويمني
عنيه بزحمة الخارجين
تدق الساعة مش بسمع
وكل يروح ومش يرجع
وأخاف ارجع
لاتيجي يا عمري متلاقينيش
أنا قاعد ومستني
وبرده في صبر وتأني
ابص ف ايدي
كانت ورده من الماضي
ودبلت
ابص ف كفي
فيه انسان بيجري
كتير علي الفاضي
خطوط العمر ما بتبان
وتتلاقي مع معادي
وهيه ف خط وحده بعيد
وقطر وماشي
ومش بيعدي ف بلادي
أقول ده كدب
كلام الكف دايما كدب
حبيبي حب
وجاي اكيد علي معادي
تعدي ساعات وراها ساعات
وأنا وحدي .. أنا وشعري
وشاب شعري
دبل وردي
وأنا مستني علي معادي
وقطر يعدي قطر يفوت
وعام بيعدي كده ف سكوت
ولا بمشي ولا برجع
ومعقول لسه موصلتيش
منيش ماشي انا قاعد
لا تيجي يا عمري ما تلاقينيش
وأنا ف محطة الركاب
ومستني يا حلم وغاب
وركاب القطور كبروا
وأسألهم قالوا ده مجنون
أنا المجنون ؟
لا بسألهم في علم الكون
ولا تركيب نواة نترون
انا بسأل علي قطري
اللي بستناه
يمر العمر ويعدي وبجري وراه
وبرده لسه موصلتيش
وفجأة الساعة كات خامسة
معادي معاكي كان خامسة
ورحت اقابلك
وانا مشتاقلك
وبندهلك
قالولي القطر مش واقف
وقلت لا
حبيبتي فيه
انا واقف ومستني
بقالي سنين
ووقفت قدام الطريق
أعلن تحدي
علي قطر الحياة
اللي بيعدي
مبيهديش
وقفت .. شاورت
علي الأمل اللي جوه الآه
علي صوت ضاع ف ليلي وتاه
ومت وغبت
خلاص يا عمري
هستناكي طول الوقت
وكل الساعة ما تدق
علي خامسة
هتلقي الروح بتستناكي
ما بتمشيش
تخاف روحي تسيب روحي
لا تيجي يا عمري ماتلاقينيش
05082009