سقا الله روضة التنهات روضة كاسب الطولات
بسيل في عروض العرق الاعلى بانت حدوده
يباشرها صدوق الغيث من نو الحيا مرات
خيالٍ كل ما ناضت بروقه دنت رعوده
عساها ما يفارقها المطر وقتٍ من الاوقات
ودايم من حقوق الوسم ماليه ومشهوده
تربع عقبها كل الفياض وتنقلب جنات
وتكسيها زهورٍ من هجير الوقت مفقوده
على شان الزعيم اللي لقدره تخضع الهامات
فهد عز الوطن يبني الوطن بالعز ويقوده
ابو فيصل صليب الراي راع الفعل والوقفات
ليا جا اليوم الاقشر واختلط عجه وباروده
على حنكة ملكنا تشهد الأزمات والشدات
جعل حيلات عدوانه على العدوان مردوده
حماها واحتماها راس ابو فيصل من النكبات
بعون الله وفضله ثم باخلاصه ومجهوده
ولد عبدالعزيز اللي جمعها والبلاد شتات
معه شبه الجزيره بالسعد والخير موعوده
بلاد خصها الله بالمشاعر وارضها خيرات
على استقرارها والأمن والخيرات محسوده
ألا يالله يا منزل بهديك محكم الآيات
تعز ملوكنا ستر الوطن وحماه وسعوده
هل العوجا ذرانا هم هل الصولات والجولات
رجالٍ في نواصيها ترى الخيرات معقوده
عسى الله يبقي الحيين ذخر ويرحم الاموات
وحنا كلنا خدام وآل الامر وجنوده