سلام الله بطاروق يحوز من الرجال رجال
يخص الطيبين أهل الوفا كسابة الطاله
رجالٍ معرفتهم ما تباع وتشتري بالمال
وخوتهم تنومس من شغل بالمرجلة باله
رجالٍ تستحق المدح والشاعر بهم يختال
يحق له الفخر في مدحهم والسعر يحلاله
وانا لي مارد معروف تقصر دونه الانذال
وابا اسوق الركايب لين انوخها على جاله
ودرب الطيب واهل الطيب ابلقى لي معه مدخال
على وضح النقا امدح كل رجلٍ طيب لحاله
وانا يوم امدح اهل الطيب لا كاذب ولا محتال
احسب للكلام ومطلعه قدام مدخاله
وابو عيد اولٍ من اصب له من دلتي فنجال
ليا زانت طواريق القصيد وفاحت دلاله
كبنه من رجالٍ تثبت الاقوال بالافعال
عن دروب المراجل والوفا ما تقصر حباله
شهر صيته وطيبه للعرب تضرب به الامثال
وانا اشهد له بقولي والرجل تشهد له افعاله
كريم الجود وقت الجود فالشده وسيع البال
عزيز النفس في ذروة سنام المجد منزاله
طويل ذراع في وقت اللقا شهم وكريم سبال
ورث طيبه من جدوده ومن عمه وخاله
عسى يفدا جهز بالطيب والرفقه ردي الخال
ليا منه بغى يوفي نقص فالكيل مكياله
ضعيفٍ ما يحوش المرجله خبلٍ قصير احبال
وفي سلم المراجل عن حياته موته اشواله
ليا جات اللوازم عن مواجيبه لقا محوال
ورزقه دوب يشبع بدته ويكفي عياله
وابو عيد المراجل في يده ما جابها الدلال
يبيع ويشتري في سوقها والطيب من فاله
من اللي بالمراجل في موازين الرجال ثقال
جهز واسعد عين اللي ليا عمست تعنى له
ليا ثقلت حمول اهل الركايب للحمول جمال
جمل زومان لا منه برك للحمل يشتاله
إهداء إلى الأخ / جهز بن سند الغبيوي