دن الفراق وداخل القلب دن دنّ

وطوتني الايام في مرها طيّ

الشوق واللهفه وذكراك يربن

في قلبي اللي منكوي بالهوى كيّ

زود المواجع خلت الصبر منجن

وخلت حياتي مظلمه مابها ضيّ

قلبي اسره الهم للحزن اذعن

تايه بعد فرقاك من دنيته عيّ

اذا ذكرتك ارفع الصوت واون

يللي حياتي دون شوفك ولا شيّ

كني بصحراء تايه بأول السن

لا ام وحداني ولا اب لا خيّ

اهات قلبي فوق راسي يحومن

واناادور بين كثبانها ميّ

مره اصيح وكن في داخلي جن

ومره انوح وكن مافي البشر حيّ

هايم بعد فرقاك مدري انا من

كني يتيم فاقد الام والبيّ

ويلاه يامن بعدها اليوم يغبن

ويلاه يامن تروي الروح بي ريّ

يللي عطيتي للفرح ضحكت السن

واللي عطيتي للمحبه سنا الضيّ

من لوعة الفرقا مشتت ومحزن

انت الفرح والحب والماء والفيّ

غدر الزمن بسيوف الاشواق يطعن

في قلب من حبك ولا تسمعي الـ...ايّ

يا صاحبي لد النظر فيّ وامعن

كيف المواجع تلوي القلب بي ليّ

اعلن حروبي ضد فرقاك واشن

وا رجعك يا منية القلب بيدَيّ

يا خل وان قفيت لشتاق واحن

واخلص لك الاحساس ما دامني حيّ