تلّ قلبي تل جيبٍ لشكمانه صفير

كل مازوّد له النار سوّاقه عطاه

منتويله طرقةٍ دونها دربٍ عسير

إعترض عرق الابيتر ولزّا من وراه

شابكٍ له سن قيره وأبنصه للاخير

ماتقول انّه دفع فيه ماله واشتراه

من سبايب حملةٍ جابها وامره خطير

ساق عمره للخطر والمخافه ماعلاه

المنافذ سكّرت مير سوّاقه خبير

قبل يشري حملته راسمٍ دربٍ عطاه

إقتحم كل المخاطر مع الثلث الاخير

ومع صلاة الفجر قد وقّفه بين إعملاه

مثل فعله فعل من صار له قلبي أسير

لو توسطنا بكوفي دخل ضمن إسراه

يالطيف الروح ياعنق خشفٍ مستذير

ياعيون اللي على الرجم ماحصّل عشاه

رد لي قلبٍ أخذته ونذكركم بخير

لاتجي قصّة مقيط وعلى دربه رشاه