يالآدمي رح بحالك وأترك الناس

الخلق هذي إتّعب من ينقدها

قصر القدم عن كثير الخلق نوماس

اللي ليا اقبلت حجّانه يعقّدها

لولاك تعرف طبوعه قلت ما بأس

كلمة هلا في قدومك مايرددها

لاجيت يمّه مسيّر جاه وسواس

يسب في الخلق وافكاره مبدّدها

مدّة جلوسك معه مشحون الانفاس

يطالب الورع والحرمه يهددّها

كنّه على الخلق مدعوماً بحراس

لو أمرهم في يده يمكن يشدّدها

بعدك مع الارض عنهم يرفع الراس

ونفسك عن اهل الردى لازم تبعّدها

عندك كرامه وفيك شعور وأحساس

وارفع مقامك ونفسك لاتزهّدها

بعض المجالس هزيله مالها ساس

والجلسه الطيّبه تجني فوايدها

سيّر على اللي محلّه فيه الاوناس

يفرح ليا جيت وعلومه يفقّدها

تلقى المشاكيل عنده دوم جلاس

هذي طبوع الرجال وذي عوايدها

وصلاة ربي عدد ماهب نسناس

على نبي الرساله يوم وحّدها