بدّيت ذكر الله على كل مكتوب

الواحد اللي دبرة الخلق بيده

اللي عقل يوسف على ابوه يعقوب

واختص بالقرآن صفوة عبيده

سلام ياأميرٍ عرف كل ماجوب

إعداد ماتكتب حروف الجريده

يابن الكرام اللي له الطيب منسوب

اهل الوفا واهل الفعول المجيده

إلهم بكسب المجد هومات ودروب

وعرق الندا منه الندا يستميده

زبن الضعيف اللي من الوقت منكوب

وسلطان غيثٍ بالليال الشديده

يا أمير جيتك طالبٍ منك مطلوب

يامعطيٍ راع الطلب مايريده

يامير ماكلٍ يبا يقضي النّوب

وانته يابوخالد خصالك حميده

الله عطاك خصال بالطيب موهوب

ويمناك دايم ماتمدّ الزهيده

يامير عطني من سلالات شيّوب

أملح جنوبي والمعانق جويده

أملح فريد أوصاف مافيه عذروب

راسه مربّع والاذاني حديده

هزعٍ عراقيبه ولافيه شاذوب

صدره سنادٍ والتّهايا فريده

وهذا هدف قصدي وانا اطلبك بأسلوب

وقل تمّ تمّت لك ليالٍ مديده