أهلا هلا باللي لفانا من الشام

أولاد لام بكل قرية وديره

يا مرحبابه عد ما حدّرت لام

قبايلٍ من نجد بارض الجزيره

ويا مرحبابه عد ساعات الأيام

واعداد ما في لام فخذ وعشيره

وعداد ما يكتب لهم حبر الأقلام

يشهد لهم تاريخ نجدٍ وغيره

تاريخهم يشبه أساطير الأحلام

واللي قراه يذوق نقص ومريره

منهم كثيري فارسٍ حر مقدام

فيه الحميّة للقبايل وغيرَه

ومنهم مغيري رافع السيف همّام

مذكورةٍ في نجد وسط الجزيره

والفضلي ان دارت دواليب الأيام

ما ينكر التاريخ مجد المسيره

يا عزوتي ياللي سقيتوا من السام

حريبكم بسيوف لام الشطيره

يا ما لطمتوا من شجيعٍ ولطّام

ويا ما كسبتوا من غنايم كثيره

حنا حكمنا نجد اربع مية عام

والله عطا للناس شوف وبصيره

مذكورةٍ في نجد من عقب الإسلام

نسل الصحابي اوس جوها مسيره

نسل الصحابي اوس يا خير الأقوام

سلايلٍ من طي كسب الكبيره

الضيف يلقى عندهم خير وانعام

ولا الحريب يذوق نارٍ سعيره

صبيهم بالحرب فارس وضرغام

اللي ضرى من يوم سنّه صغيره

ربعي سلايل طي ربعي بني لام

ربعي مصابيح الظلام المنيره

يقولها من عزّكم طول الأيام

كثران ولاّ فضول ولاّ مغيره

الله يجمعكم على راي الإسلام

ونرجي سحاب الخير ينزل مطيره

في ظل ابو فيصل فهد زبن الأيتام

في خدمة الإسلام كلٍ يشيره

وختامها صلوا على نبع الإسلام

محمد المختار في كل سيره

والمعذرة كان المشاعر والأقلام

ما وفّت بحق الوجيه السفيره