يا سعود فنجالٍ بلا هيل مابيه

وبيتٍ بلا زوار ما فاح ندّه

ياسعود مابه صافي الاّ ويغثيه

هرج الحسود اللي عن العز لدّه

لو قال لك عن صاحبك فيه مافيه

باب الكلام اللي يجي معه سدّه

وقلّه تراي ادرك مواقع مراميه

وما قال عندي غير ماقال ضدّه

خوينا لازم نعزّه ونغليه

وبكفوفناحبل الصداقه نشدّه

وخوينا لا زم نوده ونرضيه

وعنه الخطا ياسعود لا زم نردّه

يكفيه من طيبه الى امعنت ماضيه

لو كان قصّر في هالايام ودّه

لو سيم وده بالذهب كان نشريه

لو طولوا ياسعود بالنقد حدّه

والواجب انّا ننتبه ويش حاديه

ونشوف ويش اللي عن الوصل صدّه

والواجب انّا كامل الحق نعطيه

ومنّا وفينا بالمجالس نعدّه

ونرد هرج مدور الهرج في فيه

وبالنار نكوي راس خشمه وخدّه

ويروح منّا مابرد حر ضاميه

والمر في صدره من الغيض قدّه

اللي نفخ في خابي الجمر يحييه

ومبنى الغلا ودّه يجيه ويهدّه

مع غيرنا يا سعود يلقا مناويه

ياخذ كلام وخايب الهرج مدّه

نذلٍ عسى قصّاف الاعمار يطويه

لو كان من بين اطيب الناس جدّه

ابليس يلعبّه عن الدرب معميه

يملي عليه وفالمهمات كدّه

لعل ما نسمع بذكر ه وطاريه

وان حل ذكره بالتعاويذ بدّه