صلّوا عسى تقبل صلاة المصلّين

وادعوا عسى يقبل دعاء كل داعي

إن الوفاء يبقى شعار الوفيين

ما يختلف عقب احتدام النزاعي

وان الصراحه في قلوب الصريحين

تبقى ولا ضحك الوجيه الصناعي

أقولها والخشم تدمع له العين

واللوم ماله بعض الأحيان داعي

ولا فيه ما بين المثايل وما بين

ضيقات صدري عقب طول اتساعي

الا بفقدي للرجال الحشيمين

اللي لهم طيب النفوس متداعي

اللي تمد يدينهم للميامين

وتزين فيهم طيبات المساعي

اللي مرافقهم يجيلي على الدين

رافقتهم عن معرفه واقتناعي

هم محزمي لاضدني وقتي الشين

لاجيتهم همّي عن القلب ماعي

من مثل ابوعلياء طليق الحجاجين

اللي لحاجات الرفاقه يراعي

للطيب والنوماس عنده دواوين

وطبيعته يبقى وراها انطباعي

مهيب فزة يوم والاّنهارين

شمسه لها في كل حيٍ شعاعي

عسى فداه مشجعين الرديين

اللي يبيعون الردى لو يباعي

اللي من اصناف المراجل خليين

ومن كل حاجه تنتقصهم شباعي