عدّي على اصبعك البنات المفاريع

اللي بهن من كل زينٍ غريبي

وقولي لهن زينات واقول ما طيع

واضرب على زين البنات الصليبي

اللي لهن كم القلوب المصاريع

بس ان عيني سبرها للربيبي

اللي محاسنها من الريع للريع

لا شفتها ما ضاق زري بجيبي

يابنت يامزنٍ بروقه تلاميع

لاطب قاعٍ فاح له ريح طيبي

ياتل قلبي منك عساي ما اضيع

كان السهوم انظار لازم تصيبي

اشري بسوقٍ تدهلينه ولا ابيع

الله على من حطني به حسيبي

خذ يارفيقي ما تبي من تواقيع

ووصل حبيبٍ يم غاية حبيبي

من كف غيره مال مثلي منافيع

ولا للمريض الا يطيع الطبيبي

وللطير في برق الحباري مطاليع

كم صك وجولٍ والنواجي هريبي

وللناس حظٍ فالهوى والمشاريع

ياعل حظي يافهد ما يخيبي

دنياك بس أيام تمضي واسابيع

ولا حاصلٍ لي غير قسمة نصيبي