أنت آخر الحلم يامسراي ولا اوله

ابطيت واقف ولاودي وقوفي يطول

قفا لنبكي على الاطلال والمهزله

ابطيت كم لك بخفاقي تصول وتجول

وجه تغرب عن الترحال لاتسأله

احشم سكوته ولايكثر حديث الفضول

ضاق المكان وجزعت من المكان وهله

ياكثر ماضيقه عقدة حجاج العذول

ليت الظمى لاتجاهلته قدرت اجهله

لاخانت الارض والمسرى وخان الذلول

انا عشقت الطريق الصعب واتحمله

خسرت اشيا كثيره واستحق الفصول

ياطفلة الريح طال الليل يامدلله

اشتقت اشاهد سنا الفضه ولعب الحجول

يبطي صهيلك من الخفاق واستعجله

وحديث يالشارده يالصافنه يالجفول

لو مادرى البير عن شرهة عذوق نخله

ماللسواني خطيه بالنخل والذبول

اضمى وتروى الصدور العطش والممحله

والنزف مرباع مثله مثل أي الفصول

ياحادي العيس لاجابك حنين ووله

انت تعرفني ليا صديت صدت زعول

وجه تغرب ثمان سنين واشتقت له

مابيه يرجع ابيه يطيع بعض الحلول

ماقلت له بالوعد واقفيت ماقلت له

ماني من اللي تحده على اقصاه ويقول

الليل موحش ظلامه واستحيت أسأله

عن قصة النور واطراف الصباح الخجول

رقيت له بالخيال ولاقدرت أوصله

واكثر احلامي مع الايام ترقى نزول

والجادل اللي تثير الصمت وتأوله

في صمتها الملح والمينا وفرحة وصول

سكر قصبها تهادى للطريق أوله

في ميلته اعتدال وبعتداله ميول