يالعام الاول طعونك طابت العام

وآخر طعونك سترته بابتسامة

والعبرة اللي ندمها عضة بهام

عضة بهامي من العبرة ندامة

كنيتها خوفة الحاسد ولوام

كنت احسب الدمع ياصل للكرامة

تزاحمت بالخفوق وصارت انغام

اثر انتصار العباير بازدحامة

حول غزير السحاب وغرقة اكمام

ولاغصن خضر ولا غنت حمامة

بوحي وظبي العدامة تالي حطام

ولابوح باقي ولا ظبي العدامة

وطيحة ثمنها جواد وضيعة لجام

ماهي بسلامة قريب من السلامة

يالمترف اللي حبست اللول بالثام

وضيك توايق من فتوق الغمامة

لك بالمحاني بياض وتالي اقلام

في كل الاوراق تلقالك علامة

لك بالمحاني قصيد ودمع واحلام

وساحل ومينا وبحرين ومنامة

يامدلهم الهدب واهدابك الهام

ياسبة الجرح واسباب التئامة

توك على البال اهوجس فيك بهيام

وحكي التعاليل عن قذلةوشامة

مرات ترمي زمام وتلبس زمام

وتسخر من العقد لاشك بمقامة

سكر سنين الشتات وملح الايام

ياشمعة الليل ياسيد ظلامة

ادمت خفوقي مشاريهك ولانام

وجربت حرب المضامي واحتدامة

سجيت الاقدام والا ادميت الاقدام

حزن الشمالي مبين من كلامة

لاجاك عني سفيه وفي خبر هام

اخذ الخبر بس طالع في ختامة

تلقاه ارعن ذليل ويرضي اقزام

وهذا دليل انتصاري وانهزامة