يطيب المسا ويرق غصن وتهب رياح

لبس وادي الميعاد من سندس وشاحه

تحايت رياحين الصبا واينع التفاح

نمت واسفهل الطيش وانهل مسباحه

ياعل السنه هذي نديه بطون الراح

بعيدة شبه من علقم العام وجراحه

تقهويت صلف طعونها وارتويت رماح

تقاضت من المذبوح لعيون مذباحه

تمنيت وجه مابغيته يروح وراح

ترك لي تناهيدة ومرثية افراحه

نهار الشتات اول ضحى ماذخرت نياح

أثر عبرة الرجال عجلة و فضاحه

تحريت لاشح الرجا والسنين شحاح

سنين مهي سمحة محيا ومزاحه

عليه الملام اليا تركني خلي افراح

ولاشال من صدري بقاياه وارماحه

وعليه الملام اليا نبت بالضلوع جناح

ولافزز المعلوق صوته وملواحه

عليه الملام اليا سرى الموج بالسباح

ولاابحر مجاديفه على ضي مصباحه

خسرني وانا من غيبته ماجنيت أرباح

تخيرت اروح وخابر وقت مرواحه

وعليه الملام اليا ركض له صويب وطاح

ولا وسده كفه وغطاه بوشاحه