عصر الثلاثاء نطحني جادل غطروف

سقو سقى الله نهار شفت به غالي

نبنوب عوده على الموده وفيه زلوف

ومنين ماهبّ نسناس الهوا مالي

سود محاجر عيونه والهدب مرصوف

ميّاس الاعطاف خدّه يشعل اشتعالي

ابصرت عقبه وانا قبله قليل الشوف

واسقا عروق الضماير عقب الاهمالي

شفته وهو حاسر بالثوب والنفنوف

واشقر على عزلة الردفين ميّالي

سبحان من صوّر اخلاقه بحسن وصوف

كتف وردف وقيدل وفنجالي

هذي وصوفه وطلاّب الهوى مشغوف

ليله نهاره مشيح مرقده خالي

ياويل من ذاق لذّة ضامر السرجوف

وابطا عليه العلل من عقب الانهالي

يارد حياض المنايا بالرجا والخوف

ويدافع الوقت من حال الى حالي

يازين مالي عليكم بالهوى معروف

ارحم رحمك الولي في وزن الأعمالي