لاتعتذر ما عاد ينفعك العذر

العذر للي ما تمادى في خطاه

والا انت مثل اللي سبح عكس النهر

شغل مجاديفه بعكس الاتجاه

خلفك خطاك وقدمك أهوال القبر

واللي وراه أشد وأعظم من عناه

ياهيه مأدري كم تجلس تنتظر

عمر الشقي يقضي حياته في شقاه

عمرك تراه شوي من عمر الدهر

كل شئ في الدنيا يبي يبلغ مداه

ياقصر عمرك لو تطاولت العمر

لازم يجيك الموت وانته ما تباه

إذا أنتها عمر الفتى ماله مفر

كنه شهر من مبتداه لمنتهاه

ما ينفعك في الموت زيد ولا عمر

كلام واضح لاشكوك ولا اشتباه

وقف وفكر قبل روحك تحتضر

واحصل من التوبه على سترة نجاه

لا تنخدع وتموت وأعمالك صفر

ما تنفع التوبة إذا جتك الوفاه

الاستقامة واضحة مثل القمر

في ليلةٍ فيها السماء صافي صحاه

والا الدروب العوج تغري من فجر

عيناك تنظر بس قلبه في عماه

تجنب الغيبه وزلات البشر

الناس كلٍ في حفاه اللي كفاه

حلاوة الدنيا لها طرة زهر

لايخدعك طول الأمل حد الحياه

أهم حاجة بالمفيد المختصر

اسمع كلام اللي كلامه ما كناه

قل ربي الله واستقم جمع وقصر

وصية محمد عليه أفضل صلاه

هاذي نصحية تعتبر وجهة نظر

والكل حرٍ في الطريق اللي يباه