قالها من هيضه عيد المنامه

من بنات افكاره يصوغ الفرايد

هاجس الفكره طغى فيني احتدامه

والمشاعر بالحشا تشعل وقايد

لاح برق العز وانهلت غمامه

وانتعش كل يابسٍ واقفر وبايد

فوق دار المجد ينبوع الكرامه

دار من هو منزله فوق النوايد

سييدي حييت ماغنت حمامه

وعد ماحرفٍ تسطر بالجرايد

يالمليك الوايلي عز وشهامه

الشجاع العادل الحر المحايد

كم من شخصٍ لقى عندك مرامه

لاشتكى من جور ضيقات الضهايد

دامك انت للعطا والجود هامه

وافيٍ بالقول وبالأفعال كايد

ولا على حب الوطن ذره ملامه

نهتدي للموت في يوم الشدايد

ولا على شاعر يبادلك احترامه

واجب نهنيك بطروق النشايد

والفخر والعز وتحقيق الزعامه

والشيوخ اللي وسعين البنايد

والعلا والصيت وعلوم والفهامه

وعهدك اللي زاهيٍ زهو القلايد

وشعبك اللي اكد اليوم انسجامه

وثق الدستور واعلنها وكايد

كلها ياسيدي رمز وعلامه

بأنك انت للعلا والمجد قايد

دمت للبحرين ميمون السلامه

وياعساها سنينك سنينٍ مدايد

وياعسى الافراح دايم مستدامه

وياعسى ذا العيد كل الاعوام عايد