يا ظامي البعد شوف الهم طوقني

والضيق طير بناء في داخلي عشه

عانقت انا الهم  يوم الحب عانقني

واصبحت عطر طموحه يرجع الغرشه

متوهق دوم وزاد الحب وهقني

خلاني اطرد سراب افراحه  وعرشه

بكاني البعد لين الدمع نطقني

والبعد صوته حزين ويجلب الوحشه

مدام تدري غيابك شي يضايقني

لا يخدش البعد  قلب يموت من خدشه

ماكنك اللي وعدني مايفارقني

وماكنك اللي وشم في خافقي رمشه

من سارقك مني  ياللي مني سارقني

زرعت فيني قلق واثمرت لك رعشه

اذكرني اليا سمعت الشوق غرقني

وسمعت صوت الغريق وصيحة القشه

واذكرني اليا ذكرت الهم طوقني

وان هز ريح الحنين اغصانك الهشه

واذكرني اليا طفاك الشوق واحرقني

وابكيني اليا ذكرت الحب في نعشه

مادمت عايش  وتهواني  وتعشقني

تبقى اكثر انسان له في داخلي وحشه