في بالي من كلام الناس كل اللي في بال الناس
جمعت: ولا جمعت إلا عشان ارميه من بالي‏
مزاجي صعب ما يصلح ولا يركب على أية رأس
صحيح إني وحيد بهالوطن بس الوطن خالي
مزاجي ما تزول إن جاك باس اللي يزول الباس‏
أقولك مثل ما ودي أقولك نبض وآمالي ‏
أبقطع بالمشي درب الرجاء ما بقطعه باليأس
على باب الكلام البكر أرتل ما تهيالي ‏
تعودت أطلق الكلمة تحلق خارج الأقواس
على حريتي يا ما على حالي رثى حالي
في هذا الجيل كم من شاعرٍ غاوي بليد أحساس
يمر مع الحزن ما يحمل من الحزن مثقالي
حياتي شيطنة بيني ويبني نزعة الوسواس ‏
تقل لي : "لا تقل لي قل أعوذ بربي الوالي"‏
حياتي ظل "سدرة باب وج "* وصعلكة جلاس ‏
نميل ونعتدل ونميل وين الظل ما مالي
تعبت امشي لحالي صرت اشك في معظم الأنفاس
أقل لك: يا لحالي.. رح لحالك بقعد لحالي‏
حبيبي والغواية بعد هذا الحد ما تنقاس
أحب من التعب كل التعب واكره عتب غالي‏
أحس بداخلي صرخة سجين وكلبشة حراس‏
وأنا يدي على يدي وأحس بشي يبقالي‏
حبيبي ما تزول إن جاك باس اللي يزول الباس
على بالك كلام من الكلام اللي على بالي