نادوك في (مي) لكن (مي) بلساني

بضمها لين تطرد (ميمهم)( ميمي )

يعني بناديك (مي) بلفظه الثاني

يحق لي يوم أنادي قايد الريمي

مادام لك يالحبيبه وسط وجداني

مركب وموجة غرام وساحل أقليمي

خليني أشب ليلي واعزم ألواني

أبرسمك وأتفنن مع معازيمي

مدري عشان الشعر وألا علشاني

يومه ترزمك هتاني قبل غيمي

قصدي ترزمك غيمي قبل هتاني

أجل لي الحق في أخذي وتسليمي

لعيونك اللي بحرها يستر أحزاني

اللي ليا شفته ضاعت مفاهيمي

والله ماجيت لعيونك كذا عاني

وانا مغاتيري تسابق مجاهيمي

إلا عشان الهوى اللي شوقه أضناني

مبطي وقلبي ياحلوه بالهوى امريمي

إيوالله أغليك ياسراية أوزاني

يعزفك شعري وترقص لك ترانيمي

في غيرك الشعر ياحلوه تحداني

واليوم أنا أحضر بعينك (حفل تكريمي )

قبل تقولين ودعني ولا أعطاني

رأيه بزيني .. ورأيه في تقاسيمي

أنتي جمالك قسم بالله رباني

زينك مقيمي مايحتاج تقييمي

لكن محيرني اسمك واسمك الثاني

في أي منهم أنادي قايد الريمي

تدري أبجمعهم الاثنين بلساني

يعني : إذا جيت أنادي قلت : ياميمي ..