بغيت أطير من الفرح والوناسه

لا وش بغيت أطير الا قسم طرت

ولا دريت إلا وأنا ابوس راسه

قبل اسئله وأقول وش بك تأخرت ؟

ماهو أنا قلبي من الشوق باسه

وألا انا لو هي عليه تكبرت

يكفيني انه جاء وهذا إحساسه

يحس فيه .. لا قلقت وتوترت

لا يابعد هالعالم وبعض ناسه

عز الله اني يومي اخترته اخترت

جمعت له مابين لوله وماسه

أحلى صور للشعر : يعني تصورت

إن الفضاء هذا بكبره مقاسه

رغم التفجر توني ماتفجرت

أمووووت من مبلوله إليا يباسه

وامووت به واحياء ليا من تذكرت

إنه من أيام الصبا والدراسه

وهو يداري خاطري لا تكدرت

واليوم جاء من دون حشد وحراسه

مخطي عليه .. وتوني ماتعذرت

شفته وطرت من الفرح والوناسه

وشلون طرت .. الله وأعلم ( كذا طرت )