مسافة الشعر تكتبني وانا بالدرب رحال
يلقابها الشاعر احساسه و يقطعها ب قافه
لا صار يعشق ويتمنى ويرقى روس الاقذال
ليا احصلت ماعلى الدنيا ومافيها حسافه
الشعر : يحكي معاناة الصدور ويكتب الحال
ويعالج الناس من جرح المحبين ! وخلافه
الشعر منفى لو انه بالسجون وبين الاقفال
لو بارت اصحابه و بارت به اقلام الصحافه
الشعر غالي ولا يرخص ابد في كل الاحوال
لو يلحقه تالي ايامه من اغراضه : كلافه
الشعر طير ٍ يجاذب في لحونه كل موال
ماغنته لو تهزّع حرفه ارقبة الزرافه !
الشعر يسمَع و لو تغتال صوته بعض الازوال
اللي يخالط ضجيج اعمالها بعض السخافه
الشعر امانة عرب وامانته اثقل من جبال
يبي لها فكر يحملها ، و يشبعها حرافه !
الشعر فوق التصور و الجَدل و اطياف الأشكال
الشعر حال الضلوع و صوتها رغم إختلافه
الشعر يقطع مسافات الزمن ب حساب الاميال
و يقرّب المستحيل و يسبر : أغوار اكتشافه
الشعر ماله و مال المال و الا سكة المال
و لا يمكن إيصير مهما صار به : آلة صْرافه
الشعر ينتج فكر ما ينتج اسماء رجال الاعمال
اللي بدت تكتب اسماها على صفحة غلافه
الشعر ماهو على كيف الظهور و حضرة البال
لو قالوا اللي يحبه مع مرور الوقت : عافه !
الشعر الاسمى على كثر الكلام و كثر الاشغال
و اكبر من حكاية الاسماء و من حال إختطافه
الشعر تقدر تقول المزن / و الهمال لا سال
ولاهو على طول رعاد المزون : اله ارتجافه
الشعر يتبع مثل مايتبع الريضان : و بال
لا عسه الهاجس و بشربه الهاجس و شافه
الشعر حسب اتجاهه و الدروب اقصار و طوال
و كل ٍ حسب خطوته يمشيبه و حسب اعترافه
لو قلت لك اعتبر هالشعر يابن الناس رجال
له واجب القدر و الحشمه و له طيب الضيافه
لا تقول : قندت له دله ! و له صبيت فنجال
عذر الكرم للكرام / اقلط على قل الكلافه !
اعوذ بالله من بعض الظهور و بعض الاشكال
و اعوذ بالله من سقط الهوان و كل تافه !
الشعر فوق الوصول / و كلمته عن كل الاقوال
له دربه المستحيل / و خطوته تكمن ب قافه !
الشعر ب معادلات الفكر مال الشعر حلال
الا على اللي كثر مايامن دروبه : يخافه
قبل التمني و قبل العشق و الا روس الاقذال
احسب حساب الدروب : و بعدها : قيس المسافه !