أنا ادري انك يوم ماجيت ضدي

في فرحتي القاك والقاك اذا ضقت

والله غيابي عنك ماهو تحدي

الوقت هو كل السبب ياخذ الوقت

لا الكيف كيفي لا ولا الود ودي

شف من عذابات الزمن وش كثر ذقت

الحال بعدك يالحبيب متردي

واضح لو انك في ردى الحال دققت

لولا على رجم القصايد ماأعدي

يمديك ياملح المحاني تفتقت

بشر عسى جالك مع الوقت ردي

وعساك عن صدق المحبه تحققت

واللي حرم عيني سواليف خدي

ماطعت بك عاذل ولا فيك صدقت

أمد لك قلبي وروحي ويدي

أمد كلي لك ولا تسأل اشتقت

جيتك بعد ماوقف الوقت ضدي

معاهدك لا تصير ضدي مع الوقت