أرجوك عطني من حياتك حياتي

ودّي أعيش بدنيتي لو هي أيام

تعبت اعالج ظرفك (إ)بتضحياتي

وأكسر ظروفي لجل خاطرك وأنلام

تعبت أحبك وأجمعك من شتاتي

تعبت أداري فيك عام ٍ ورى عام

ياخي خلاص إما تجي ياغلاتي

وألا تروح وتبتعد طيف وأوهام

صرت أدعي الربّ العزيز إبصلاتي

ينجي غريق ٍ قلبه بحبكم هام

كل مانويت أنساك وأنسى شقاتي

وأنسى ليالي عشتها فيك واحلام

أرجع وأشوفك محتضن ذكرياتي

لوحة غلا شدّت نظر كل رسام

حيرتني ويش السبب ؟ ياغناتي

كل مامشيت أشوف صورتك قدام

بالعين جوّا القلب وسط المباتي

في دفتري ومابين الأسطر والأقلام

مثل الغدير يلف ّ حولك نباتي

يموت لو تجفى وإذا غبت مادااام

إن كان هذا الحب ويش السواتي ؟

كيف الحبيب يعيش بالحب منضام؟

بس إسمع إسمع ياعذابي وصاتي

بيت ٍ لك الله مايجي غير بإختام

لو إسألوك الناس سبّة وفاتي

قول السبب مات بغلايه ولا قام