بسم الذي كوّن جميع المخاليق

وأنشى عيون تشوف منها دروبك

أبدي قصيدي والمساري توافيق

وأسري على ذكره بلحظة غروبك

أبكسر الضبّه وأفك الصناديق

وأطلّع الخافي على كم ثوبك

يازين جيتك ساري ٍ بالمواثيق

مأبغاك تجهل منهم ألي انهبوبك

لفيتني عسّاس مع نشفة الريق

وبلّيت عرق ٍ ناشف ٍ من اعذوبك

نهبت قلبي بالحِيّل والتشافيق

وأظفيت لمسه طاغيه في اسلوبك

والحمد لله دون لف ٍ وتلفيق

طيبي ومشاعر خافقي اثروبك

وأرخيت قلبك بين ذيك الطواريق

وارويت عرقك وأرتوت به اشعوبك

ونهبت قلبك والدموع الغواريق

وطبعت إسمي بين نفحة هبوبك

وخليت بيبان العواذل مغاليق

وخيبت ظن ألي حكوا في اعيوبك

اكنّ ونات ٍ صعيبه معاتيق

وأجدد الذكرى شمالك جنوبك

لك خنجر ٍ مابين ذيك المعاليق

ياللي بحياتي خضت مجمل حروبك

ارحم حياتي شوّق القلب تشويق

وأِشفق على قلب ٍ سرى العام صوبك

لفّيت قلبي لفة ٍ تعشَق الضيق

دوبك على قلوب المخاليق دوبك

هذي هي الذكرى نجوم ٍ مباريق

إما إثبتت ولا سقطت من ذنوبك