مرّي على الجرح أو تدرين ! مرّيني

شوفيني اشلون اراود صفح "مريّنـ2ـي "

الليل يقرابي الشبّاك وافتح له

خلا نجومه يتامى وقام ثلثيني

في حضنه ازرع قمر واسوسن غيابك

واهز وصلك ظلام وتيبس سنيني

ياطفلة كلما تكبر يضيق المهد

راحت ثمانين بكره اسألن ويني ؟!

تطيح عيني على ريحك واسمّيبك

وترحل بك الريح لين آطيح من عيني

كم حلم القاه متدلي على وسادي

إذا شغلني السهر واتوسّد ايديني !

هذا المدى تربية عم وتبنّاني

وراني الشح كيف يمز تخميني !

يا ماخذتني من انصاتي وعاداتي

نصايح امي رغيف الصبح روتيني

علمت شعري حروف اسمك وادمنها

وان قلت : اطلق يديني ماطلق ايديني !

ياخذكْ متسللة من سور نسياني

عيا يموت الورق وين يحيا طيني !

شاعر تلبّسني الصبح وتنفسّني

ياخوفي اني حزين ولا تمرّيني !

آآه من فجر ألم ادوّرك وينك ؟!

همهمت ب الم وعد وتيّهت نصفيني !

مرّي على الشعر يا منّك تذكرّتي

شوفيني اشلون احبك بيني وبيني !