حبل الغرام اللي عقدته تلوّى

ماينطلق حبلٍ عليك متلوّي

فوق المتون وحول عنقك تطوّى

ياسقمي اللي في حشاي متطوّي

مستدخله فالجوف حتى تبوّا

مكانةٍ تشرح وتفرح عدوّي

وليا برك حظي وطاح وتثوّى

صرخت في وجهه وراك متثوّي

لو تحسنين الظن يابنت حوّا

تراي من كيد الزمان متكوّي

أنا على البلوى معير أتقوّى

وانتي على بلواك مثلي تقوّي

شوفيني اصبر وانتظر واتروّى

الحكم لايصدر بسرعه تروّي

ابا اشرح اللي صار واللي مسوّى

مانيب من ينكر وش اللي يسوّي

بين الهدب في داخل العين جوّا

مع النعاس استدخلك وسط جوّي

وليا غشى عيني كراها وضوّى

وناستي عساي مااقوم توّي

من غفوتي لين المشاعر تروّى

ياقصرها لكن فيها هدوّي

فيها السكون وداعي الشوق خوّى

عليّ ودلالي على جال ضوّي

رحبت به لو فيّ سوّا وسوّا

لولاه كيف أدخل مزاجي وجوّي