الشعر معنى ورمز وميز واحساس

الشعر قيفان واوزان ٍ عديده

لو حطوا الناس فيه ألوان وأجناس

أنا مع الشعر ماضيه وجديده

ياما أكثراللي يقولونه من الناس

لكن هيهات وين اللي يجيده

هذا وأنا فالبحر ما زلت عساس

أخشاه واخشى قوافيه العنيده

ايو الله أخشاه واخشى منه الإفلاس

ما نيب أخوه الصغير ولا حفيده

ابا أتحايل وأحاول فك الأقواس

واهديه عبر المجلة والجريده

للي كلامه يزيل الهم والباس

الغالي المنتحي دار وبديده

ليا تكلم حبس زفرات الأنفاس

وليا سكت عمت الفوضى القصيده

شربت حبه شراب الماء من الكاس

واسقيته العلم في جملة مفيده

أغليه وأشيل مقداره على الراس

واجيه لو ديرته عني بعيده

أجيه معي الذهب وعقود الالماس

لو صرت من سبته على الحديده

كيف اتخلص من الإحباط والياس

والعمر محدود والفرصه فريده

ليا تقدمت قدمي حد الأمواس

وليا توخرت ضاع اللي نريده

أنا المولع بليّا حد وقياس

وأنا المعنّى وخلق الله سعيده