حكيتي معي والشوق لهفّتو

عَا لحن لا سمعتو ولا عزفتو

من صوتك عرفتك حنوني كتير

وكل البعد ما بعرفو عرفتو

عرفت فيكي ليل ومشاوير

وفيكي فجر طالع بهفهفتو

وفيكي الربيع محمّمك بكير

وجايبلك من الزهر منشفتو

لكن أنا سبقتو حلم عَا سرير

شربت الندى عليكي تا نشّفتو

ولقيت فيكي طير ما بيطير

وحدو مخبّا بريش عاطفتو

وحلِمت فيكي حبوب للتخدير

منهن عَصَرت نبيذ ورشفتو

وحلمت فيكي حوض ورد زغير

شميت عطرو بس ما قطفتو

ومنديل عن تمّك بلا تفكير

زحتو حلتمك طفل كشّفتو

وبكرا إذا يقظه الحلم بيصير

بقلّك لقيتك متل ما حلمتك

وشفت اللي شفتو قبل ما شفتو