وشصار يعني لو حبيبي هجرني

ماهمني لاهو ولا اللي يقولون

كم واحد قبله وفيت وغدرني

ما قامت الدنيا ولا صرت مجنون

وان كان قصدك بالخساره خسرني

وان كان قصدك بالعطايا يولون

محد على ذيك العطايا جبرني

وشرواي لامنهم عطو مايمنون

شي خذيته من ابوي وشهرني

الطيب اللي حي لو كان مدفون

وبالشده اذكر بالرخا من ذكرني

واجيه انا من اقصاي لا صار مغبون

واتعب على منهو جرحته وعذرني

وامسك عليه الى اخطا كلمة اتمون

واسهر عشان اللي تعبت وسهرني

وكانه سهرني بعين ابسهر له عيون

واشكر كرم منهو عطيته وشكرني

والله يسامح من خذا وقال مديون

رح للذي تو ماعرفني وخبرني

وقله ترا نصار كلمني هاللون

كل الجفا اللي منهم ماعسرني

صاروا معي والا علي مايهمون

لي الشرف غير الزمن ما كسرني

اطيح واضحك له وانا كلي اطعون

حتى لو طيبي لعبي ودمرني

اموت لي منه ولا اموت ممنون

وصحيح انا طيب وعقلي كبرني

لكن اذا ضاقت علي صرت مجنون