راسي من الصكات مايندلف دلف

تبدي علية شمس الاحداث وتغيب

حالي قضى يابو علي وانتلف تلف

اخذت من درس الليالي تجاريب

متلطم ٍ بعمامتي والهواء صلف

ياكثر ماعانيت فالوقت ياذيب

يابوعلي سووا عليٍ العرب حلف

سود الوجيه الكالحات الغرابيب

الله على اللي يوم تنقر له السلف

يقطع ختاخيت الخلاء كنه الذيب

يدنيك من دار ٍ قلوب اهلها ولف

مايعرفون البغض والشك والريب

ويبعدك عن ديرة هل الحكي والبلف

والزور والنمة وحش العراقيب

ياذيب والله وانت مالك علي ّ حلف

ياقل في وقت اللزوم الاصاحيب

يبين طحطوح النشامى من الجلف

ويبين مقدار اللحى والاشانيب

لاخير في عم ٍ زلف قيمتي زلف

وافرح عليه شاينين الهناديب

ولاخير في خال ٍ طعني من الخلف

جعله ماهو خالي عسى رمشه يشيب

ولاخير في ربع ٍ تبيع الوفاء بالف

والكنكنة عذروب والمسكنة عيب

رجل ٍ يداريني من الحذف والشلف

ورجل يدور له عليه عذاريب

ولو يارد الضميان فوق ازرق (القلف)

اخير من عد ٍ خبيث المشاريب

ياذيب حمض العلم ماينعلف علف

ومن يترك الميقاف كب المواجيب

,عيب على الرجال فوق الردئ يلف

لو مامعه ياذيب قرشين فالجيب

وياوجد حالي ليت مثلك ياذيب الف

لرقى بهاجوس القصايد مراقيب

ولايقفي الصفياني وخاطره صلف

ويهاب من شلفاء ذياب وتراحيب