اظلم الليل الاظلم شد همك واسر

يالفؤاد المعنّى وش تحط وتشيل

ان بنينا جسر والا هدمنا جسر

ماشقحت الحدود ولا غويت الدليل

صاحب ٍ ماوراه الا المشاكل خسر

ماكسب له جميل ولا صنع مستحيل

انفلق بالعصا والا انهزم وانكسر

يوم ولع بخشم الزند راس الفتيل

ماش فالسالفة حاجة غريبه وسر

الغلط من يبا فالنذل يفعل جميل

اعترض فالطريق وحدني للعسر

عقب مااقفيت عنه ورحت عابر سبيل

المنافق منافق مايضر ويسر

من قليل الكثير ومن كثير القليل

بيّن الفرق مابين الرخم والنسر

بيّن الفرق بين الهيل والجنزبيل

حي رجل ٍ على الطاعة وقلبه جسر

يوم يقدم شجاع ويوم يرجع ذليل

الليالي تجارب بين يسر وعسر

مايشح الكريم ولا يجود البخيل

من يكب المواقيف أنه في خِسر

لويقولون عاش وجعل عمره طويل

يالله تفكني يامفك قيد الاسر

حسبي الله على الظالم ونعم الوكيل