يوم الزمن يرسم على راسي الشيب

ضاع الكلام و مات حلم الاماني

في القلب خصله تجزي الطيب .. بالطيب

ولاّ الردي قلبه بغيض و أناني

أحدٍ يعزّي كلمته بالمواجيب

وأحدٍ يخون الوعد بين المحاني

يا صاحبي ماني بعلاّم بالغيب

لكن وجهك يفضحه علم جاني

علّم كبار القوم عن كلمة الريب

ما هيب من طبعي ولا من بياني

عشت وتربّى فيّ حب المواحيب

عودٍ مورثني سلوم ومعاني

من صغر سنّي أنصي الخير وآصيب

حب المراجل منزرع في كياني

لو جار وقتي ما تستّرت بالعيب

وإن طاب وقتي أذكر اللي نساني

يا من على الطاري ضوَتك التراحيب

وش فيك .. قلّي .. ليه عايف مكاني

ضمّدت هجرك ونّةٍ بالمراقيب

لين إنثنى صوتٍ بحرقه دعاني

عيباه لو دمعك يبلّ الاشانيب

وعيباه لو حزنك من أجل الغواني

الزلّه أغرق من كبار المشاريب

والعذر أصغر من ظمى ما سقاني

الغدر يا جساس في غفلة كليب

والزير دل الثار مرّه عشاني

الطيب إذا ضرّك أسميه أنا عيب

والعيب إذا سرك ترى فعل جاني

الليل يشهد لي بصعب التجاريب

والشعر يكتبني بعد ما قراني

والوقت علّمني بسر المصاعيب

والهم خلاّني بقربه أعاني

يا ذيب ياللّي تلحق الصوت يا ذيب

بعواك تجرح كل قاصي وداني

يا ذيب أنا مثلك ترى ما لي مْجيب

تخنقني العبره ودمعي حداني

أخاف من شكوى تجيب العذاريب

وأخاف ميلات الزمن لا تراني

كبدي .. على من غيّرته المناصيب

وعمري على ما ضاع بآخر زماني

يومٍ يلبي لي جميع المطاليب

آمز من ريقه ويلحس لساني

والحين ما بيني وبينه مكاتيب

إلاّ سلامٍ من بعيدٍ كواني

لو مر ليلي والمثل بالمضاريب

أنحت حروف الشعر كسب ومعاني

ولاّ الزمن لو مر يهديني الشيب

وأهديه من عمري وحلم الاماني