شمعةٍ تبكي على الرف القديم

نورها يفضح ملامح صورتك

شامخه والدمع في المنحر لزيم

وعينها نارٍ تناظر وجنتك

كنها تشكي من الجرح الاليم

ليتها تنظر بقايا طعنتك

لجل تدري ان الهوى طعمه سقيم

وتكتشف زيف الهوى هو حرفتك

كنت احسب ان الهوى مثل النسيم

ثر هواك اعصار يتبع نسمتك

ما عرفتك تعشق الغدر وتهيم

وتعشق لطعنات ظهري حربتك

ما تخاف الله في قلبٍ غشيم

غرته سود العيون وضحكتك

هاربٍ من كل خوانٍ رجيم

مستجيرٍ بك أدوّّر ظلتك

لين صارت لي على قول الحكيم

هاربٍ م القيض وأدعس جمرتك

عذرك إنك شايْلِه سرٍ كتيم

وعذري اني ما اصدق كذبتك

وعذرك الثاني صحيح انه لئيم

يوم قلتي الناس فيني لامتك

لامتك...؟! ما تنظر الوجه الوسيم

زين خدي وطيب جدي سكّتك

وان قصدت الفعل لي كفٍ كريم

وانتي ادرى كم و كم كِدْ عزتك

وان قصدتي الباس انا باسي مديم

ما يثنّي عزمي الا جيّتك

فاحذري يا بنت لو ضاق الحليم

واحفظي قدرك وصوني كلمتك

وش عليّ إن سبني واحد نميم

إن حسدك البعض شوّه سمعتك

بس ماوقف نباح الكلب غيم

وناس نمتني تأكد نمتك

حسبي الله من بلا القول الذميم

وعاذلٍ فيني يغير نظرتك

من صدودك ذاب جرحي في الصميم

ذاب في القلب الغشيم بسبتك

وفوق خدي ذاب دمعٍ مستقيم

وانت ما ذوّبت لاجلي دمعتك

وذابت الشمعه على الرف القديم

وانت ما ذابت ملامح صورتك