ضج الشجر .. قل للهبوب اللي تهزه تنصفه

وان ضجت البيد الصدية بالورق قل حيهلا

حتى ايش لو جر الخلا بشته غرور ونسفه

كل الخلا في صولته ما زاد عن محض الخلا

يا وسع بال الطلح ... الاقشر من زمانه يقصفه

والبيد لا عِرق تجوَّد به ولا تقنى الغلا

حت الورق.. والطلح في عوده حياة مترفه

كنه من البهجة طفل غيم تشجر واعتلا

واصفى من اغصانه قراطيسه ودم ينزفه

يقطن عليه اللي عزب للبرق في جرد الفلا

قل للهبوب اللي تهزه لو تريض وتعرفه

خضرا تهلي بالوجيه اللي على الما والكلا

قل للهبوب الطلح له بوح التراب وموقفه

لو جف عرقه في سواد الرمل وانفض الملا

لا تذعرين الطلح يا خيل الهبوب المرجفه

اما افتحي طي الغصون الملهمة والا فلا

الطلح ذاكرة البداة اللي سروا للمعرفه

يوم العتام ولعثمات الدرب في عين الخلا